முள்ளிவாய்க்கால் இனப்படுகொலையின் 17-ஆம் ஆண்டு நினைவு வாரத்தின் முதல் நாளான இன்று, மட்டக்களப்பு நகரின் மையப்பகுதியான காந்தி பூங்காவில் உணர்வுபூர்வமான நினைவேந்தல் நிகழ்வுகள் முன்னெடுக்கப்பட்டன.
இன்று(12.05.2026) காலை காந்தி பூங்காவில் ஒன்றுகூடிய பொதுமக்கள் மற்றும் சிவில் சமூக அமைப்பினர், முள்ளிவாய்க்கால் இறுதிப் போரில் உயிரிழந்த உறவுகளின் நினைவாகச் சுடர் ஏற்றி, மலர் தூவி அஞ்சலி செலுத்தினர்.
யுத்தத்தின் கோரப்பிடியில் சிக்கி மடிந்த பொதுமக்களின் தியாகத்தை நினைவுகூர்ந்து மௌன அஞ்சலியும் செலுத்தப்பட்டது.
இந்த நினைவேந்தலின் முக்கிய அங்கமாக, போர்க்காலத்தில் எவ்வித உணவும் இன்றித் தவித்த மக்களுக்கு அமுதமாக விளங்கிய 'முள்ளிவாய்க்கால் கஞ்சி' அங்கேயே காய்ச்சப்பட்டு பொதுமக்களுக்கு வழங்கப்பட்டது.
"எமது மக்கள் பட்டினியால் வாடியபோது உயிர் காக்க அருந்திய அந்தக் கஞ்சியின் சுவை, வெறும் உணவல்ல,அது எமது வலியின் அடையாளம்," என இந்நிகழ்வில் பங்கேற்றவர்கள் உருக்கமாகத் தெரிவித்தனர்.
நினைவேந்தல் வாரத் தொடக்கம்
மே 12-ஆம் தேதியான இன்று முதல் மே 18-ஆம் தேதி வரை (முள்ளிவாய்க்கால் நினைவு நாள்) ஒரு வார காலத்திற்கு வடக்கு மற்றும் கிழக்கு மாகாணங்களின் பல்வேறு இடங்களிலும் இத்தகைய நினைவேந்தல் நிகழ்வுகள் தொடர்ச்சியாக நடைபெறவுள்ளன.
இன்றைய நிகழ்வில் அரசியல் பிரதிநிதிகள், மதத் தலைவர்கள், வலிந்து காணாமல் ஆக்கப்பட்டவர்களின் உறவினர்கள் மற்றும் பெருந்திரளான பொதுமக்கள் கலந்துகொண்டு தமது உணர்வுகளைப் பகிர்ந்துகொண்டனர்.