மட்டக்களப்பு, வவுனதீவு காஞ்சிரங்குடா பகுதியில் இன்று (16.05.2026)காலை இடம்பெற்ற பயங்கர மோட்டார்சைக்கிள் விபத்தில் முதலைக்குடாவைச் சேர்ந்த இளைஞர் ஒருவர் படுகாயமடைந்துள்ளார்.
இன்று காலை 10 மணியளவில் இடம்பெற்ற இந்த விபத்து குறித்து மேலும் தெரியவருவதாவது.
முதலைக்குடா பகுதியைச் சேர்ந்த இளைஞர் ஒருவர், காஞ்சிரங்குடா வீதியூடாக அதிக வேகத்தில் மோட்டார்சைக்கிளில் பயணித்துள்ளார்.
இதன்போது, எதிர்பாராதவிதமாக மோட்டார்சைக்கிள் வேகக்கட்டுப்பாட்டை இழந்து, வீதியோரத்தில் இருந்த மதகு (Culvert) ஒன்றில் பலமாக மோதியுள்ளது.
மோதுண்ட அதிர்வில் மோட்டார்சைக்கிளும், அதனைச் செலுத்திச் சென்ற இளைஞரும் அருகில் இருந்த நீரோடும் வாய்க்காலுக்குள் தூக்கி வீசப்பட்டுள்ளனர்.
விபத்தில் பலத்த காயமடைந்த இளைஞர், அங்கிருந்தவர்களால் மீட்கப்பட்டு உடனடியாக சிகிச்சைக்காக மருத்துவமனையில் அனுமதிக்கப்பட்டுள்ளார்.
விபத்தின் தாக்கத்தினால் மோட்டார்சைக்கிள் பலத்த சேதமடைந்துள்ளது.
அதிவேகமாக மோட்டார்சைக்கிளைச் செலுத்தியமையே இந்த விபத்துக்கு முதன்மைக் காரணம் எனத் தெரிவிக்கப்படும் நிலையில், சம்பவம் குறித்து வவுனதீவு பொலிஸார் மேலதிக விசாரணைகளை மேற்கொண்டு வருகின்றனர்.