மட்டக்களப்பு மாவட்டத்திற்கு உத்தியோகபூர்வ விஜயம் மேற்கொண்டுள்ள இலங்கை ஜனாதிபதி அநுர குமார திஸாநாயக்க, இன்று (20.05.2026) காலை மட்டக்களப்பு மாநகர சபையின் புதிய நவீன பொது நூலகக் கட்டிடத்தை உத்தியோகபூர்வமாகத் திறந்து வைத்தார்.
சுமார் 16 வருட கால நீண்ட எதிர்பார்ப்புக்குப் பின்னர், கிழக்கு மாகாண மக்களின் கல்வி மற்றும் அறிவுசார் தேவைகளைப் பூர்த்தி செய்யும் நோக்குடன் இந்த நூலகம் மக்கள் பாவனைக்காகக் கையளிக்கப்பட்டுள்ளது.
கடந்த 2010ஆம் ஆண்டு இந்த நூலகத்திற்கான அடிக்கல் நாட்டப்பட்ட போதிலும், நிதிப் பற்றாக்குறை மற்றும் பல்வேறு நிர்வாகக் காரணங்களால் இதன் பணிகள் நீண்டகாலமாக இழுபறியில் இருந்தன.
எனினும், அண்மைய அரசுகளின் தொடர் முயற்சிகள் காரணமாக தற்போது பணிகள் முழுமையாக நிறைவடைந்துள்ளன.
மத்திய அரசு, கிழக்கு மாகாண சபை மற்றும் மட்டக்களப்பு மாநகர சபை ஆகியவற்றின் கூட்டு நிதி ஒதுக்கீட்டின் கீழ், சுமார் 345 மில்லியன் ரூபாய் செலவில் மூன்று மாடிகளைக் கொண்ட நவீனக் கட்டிடமாக இது கம்பீரமாக எழுப்பப்பட்டுள்ளது.
நூலகத்தின் சிறப்பம்சங்கள்.
கொழும்பு பொது நூலகத்திற்கு அடுத்தபடியாக, இலங்கையின் இரண்டாவது பெரிய நூலகமாக இது தரம் உயர்த்தப்பட்டுள்ளது.
கல்வி, அறிவியல், தொழில்நுட்பம், மருத்துவம் மற்றும் இலக்கியம் உள்ளிட்ட பல்வேறு துறைகளைச் சார்ந்த 85,000-ற்கும் மேற்பட்ட நூல்கள் இங்கு வாசகர்களின் பயன்பாட்டிற்காக வைக்கப்பட்டுள்ளன.
பாரம்பரிய நூலக வசதிகளுடன், நவீன டிஜிட்டல் நூலகம் (E-Library), சிறுவர் பகுதி, ஆய்வுக்கூடம் மற்றும் அதிவேக இணைய வசதிகள் (Wi-Fi) ஆகியனவும் இதில் உள்ளடக்கப்பட்டுள்ளன.
நிகழ்வில் கலந்துகொண்ட முக்கியஸ்தர்கள்
இன்றைய திறப்பு விழா நிகழ்வில் ஜனாதிபதியுடன் இணைந்து, கிழக்கு மாகாண ஆளுநர் பேராசிரியர் ஜெயந்தலால் ரத்ணசேகர, அமைச்சர் சுனில் ஹந்துன்நெத்தி, மட்டக்களப்பு மாவட்ட நாடாளுமன்ற உறுப்பினர்களான கந்தசாமி.பிரபு, இரா. சாணக்கியன், ஞா. ஸ்ரீநேசன்,வைத்தியர் சிறிநாத்,எம்.எல்.ஏ.எம்.ஹிஸ்புள்ளாஜ், மட்டக்களப்பு மாநகர சபையின் முதல்வர், ஆணையாளர் மற்றும் மாவட்டச் செயலக உயர் அதிகாரிகள், சிவில் அமைப்புகளின் பிரதிநிதிகள் எனப் பெருந்திரளானோர் கலந்துகொண்டனர்.
நூலகத்தைத் திறந்து வைத்த ஜனாதிபதி, அங்குள்ள வசதிகளைப் பார்வையிட்டதுடன், நூலகப் பொறுப்பாளர்கள் மற்றும் அங்கிருந்த மாணவர்களுடனும் கலந்துரையாடினார்.
மாவட்ட ஒருங்கிணைப்புக் குழுக் கூட்டம்.
இந்த நூலகத் திறப்பு விழாவைத் தொடர்ந்து, மட்டக்களப்பு மாவட்ட செயலகத்தில் நடைபெறவுள்ள மாவட்ட ஒருங்கிணைப்புக் குழுக் கூட்டத்திலும் ஜனாதிபதி அநுர குமார திஸாநாயக்க கலந்துகொள்ளவுள்ளார்.
இதன்போது மட்டக்களப்பு மாவட்டத்தின் அத்தியாவசியக் குறைபாடுகள் மற்றும் எதிர்கால அபிவிருத்தித் திட்டங்கள் குறித்து விரிவாக ஆராயப்படவுள்ளமை குறிப்பிடத்தக்கது.