மெதிரிகிரியவிலிருந்து கொழும்பு நோக்கிப் பயணித்த தனியார் பஸ் ஒன்று கால்வாயில் கவிழ்ந்து விபத்துக்குள்ளானதில் 22 பேர் காயமடைந்து வைத்தியசாலையில் அனுமதிக்கப்பட்டுள்ளனர்.
இன்று வியாழக்கிழமை (10.09.2026) அதிகாலை 4.45 மணியளவில், பொலன்னறுவை - ஹபரணை பிரதான வீதியின் மின்னேரியா, 7ஆம் கட்டை தேவாலய வளைவுப் பகுதியில் இவ்விபத்து இடம்பெற்றுள்ளது.
மெதிரிகிரியவிலிருந்து கொழும்பு நோக்கிப் பயணித்த குறித்த தனியார் பஸ், ஓட்டுநரின் கட்டுப்பாட்டை இழந்து வீதியை விட்டு விலகி அருகில் இருந்த கால்வாயில் கவிழ்ந்துள்ளதா தெரிவிக்கப்படுகிறது.
விபத்தில் காயமடைந்த 22 பயணிகளும் உடனடியாக மீட்கப்பட்டு, சிகிச்சைக்காக ஹபரணை மற்றும் ஹிங்குராங்கொடை வைத்தியசாலைகளில் அனுமதிக்கப்பட்டுள்ளதாக மின்னேரியா பொலிஸார் தெரிவித்தனர்.
இதேவேளை, விபத்து இடம்பெற்ற குறிப்பிட்ட வளைவுப் பகுதியானது அடிக்கடி விபத்துகள் பதிவாகும் ஆபத்தான இடமாக அடையாளப்படுத்தப்பட்டுள்ளமை குறிப்பிடத்தக்கது.
இவ்விபத்து தொடர்பான மேலதிக விசாரணைகளை மின்னேரியா பொலிஸார் மேற்கொண்டு வருகின்றனர்.