ஆசிரியர் தினமான இன்று (06.10.2026) பாடசாலை முடிந்து வீடு திரும்பிக் கொண்டிருந்த ஆசிரியை ஒருவர் மணல் ஏற்றி வந்த டிப்பர் வாகனம் மோதி சம்பவ இடத்திலேயே பரிதாபமாக உயிரிழந்துள்ளார்.
இவ்விபத்து மட்டக்களப்பு புதூர் எரிபொருள் நிரப்பு நிலையத்திற்கு அருகில் இன்று பிற்பகல் 2.00 மணியளவில் இடம்பெற்றுள்ளது.
விபத்தில் உயிரிழந்தவர் மட்டக்களப்பு, சூரியா லேனைச் சேர்ந்த 58 வயதான திருமதி மதிவதனி கமலநாதன் என அடையாளம் காணப்பட்டுள்ளார்.
30 ஆண்டுகளுக்கும் மேலாக ஆசிரிய சேவையில் ஈடுபட்டு வந்த இவர், தற்போது மட்/ வலையிறவு மெதடிஸ்த மிஷன் தமிழ் கலவன் பாடசாலையில் ஆசிரியையாகப் பணியாற்றி வந்தார்.
இன்று ஆசிரியர் தினத்தைக் கொண்டாடிவிட்டு, பாடசாலை முடிந்ததும் தனது மோட்டார் சைக்கிளில் வீடு திரும்பிக் கொண்டிருந்தபோதே இத் துயரச் சம்பவம் நிகழ்ந்துள்ளது.
இச்சம்பவம் அப்பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது.
விபத்து தொடர்பில் பொலிஸார் மேலதிக விசாரணைகளை மேற்கொண்டு வருகின்றனர்.