இலங்கைக்கு கிழக்காக வங்காள விரிகுடா கடற்பரப்பில் இன்று (20.02.2026)ஆம் திகதி ஒரு புதிய காற்றழுத்தச் சுழற்சி உருவாகியுள்ளதாக வானிலை அவதானிப்புகள் தெரிவிக்கின்றன.
இது நாளை மறுநாள் ( 22.02.2026) ஒரு காற்றழுத்தத் தாழ்வு மண்டலமாக வலுவடையக்கூடும் என எதிர்பார்க்கப்படுகிறது.
இதன் காரணமாக இன்று முதல் எதிர்வரும் மூன்று நாட்களுக்கு (20 - 22 பெப்ரவரி) நாட்டின் பல பகுதிகளில் வானிலை சீரற்றதாகக் காணப்படும் என எச்சரிக்கப்பட்டுள்ளது.
கிழக்கு மாகாணத்திற்கு கடும் மழை எச்சரிக்கை
குறிப்பாக அம்பாறை மற்றும் மட்டக்களப்பு மாவட்டங்களில் இன்று முதல் மூன்று நாட்களுக்கு கனமழை முதல் மிகக் கனமழை பெய்ய வாய்ப்புள்ளது.
ஆற்றங்கரையோரங்கள், குளங்களின் வான் பாயும் பகுதிகள் மற்றும் தாழ்நிலப் பகுதிகளில் வசிக்கும் மக்கள் வெள்ள அனர்த்தங்கள் குறித்து மிக அவதானமாக இருக்குமாறு கேட்டுக்கொள்ளப்படுகிறார்கள்.
இன்று முதல் மழைப்பொழிவு பரவலடைந்து செறிவடையும். பெருநிலப்பரப்பின் ஒரு சில இடங்களில் கனமழை பெய்யக்கூடும்.
மத்திய, ஊவா, சப்ரகமுவ மற்றும் தென் மாகாணங்களில் மிதமானது முதல் கனமானது வரை மழை பெய்யக்கூடும். இப்பகுதிகளில் வசிப்போர் நிலச்சரிவு அனர்த்தங்கள் குறித்து விழிப்புடன் இருப்பது அவசியம்.
இலங்கையின் கிழக்கு, வடக்கு மற்றும் தென்கிழக்கு கடற்பரப்புகள் இன்று முதல் கொந்தளிப்பாகக் காணப்படும். எனவே, மீனவர்கள் ஆழ்கடலுக்குச் செல்வதைத் தவிர்க்குமாறு அறிவுறுத்தப்படுகிறார்கள்.
வழமையாக பெப்ரவரி முற்பகுதியில் விலக வேண்டிய வடகீழ் பருவக்காற்று, இம்முறை மார்ச் நடுப்பகுதி வரை நீடிக்கும் என கணிக்கப்பட்டுள்ளது. இது காலநிலை மாற்றத்தின் நேரடிப் பாதிப்பாகக் கருதப்படுகிறது.
இலங்கையின் நெற்செய்கைக்கு முக்கியத்துவம் வாய்ந்த கிழக்கு மாகாணங்களில் தற்போது நடைபெற்று வரும் அறுவடை நடவடிக்கைகள், இந்தத் தொடர் கனமழையினால் கடுமையாகப் பாதிக்கப்பட்டுள்ளன.
தற்போது நிலவும் 'லா நினோ' நிலை மாறி, ஆண்டின் நடுப்பகுதியில் இருந்து 'எல் நினோ' நிலை உருவாகவுள்ளது. இது எதிர்காலத்தில் கடுமையான வறட்சி, அதிக வெப்பம் மற்றும் திடீர் வெள்ளப்பெருக்கு போன்ற சவால்களைத் தரக்கூடும்.
"பருவநிலைக்கும் நெற்செய்கைக்கும் இடையிலான ஒத்திசைவு சீர்குலைந்துள்ளதால், துறை சார்ந்த நிபுணர்கள் உடனடியாக மாற்று வழிமுறைகளைச் சிந்திக்க வேண்டிய தருணம் இது" என வானிலை ஆய்வாளர் நாகமுத்து பிரதீபராஜா தெரிவித்துள்ளார்.