மட்டக்களப்பு மாவட்டம் பட்டிருப்பு வலயக்கல்விப் பணிமனையின் நிருவாக எல்லைக்குட்பட்ட கோட்டைக்கல்லாறு கிராமத்திலுள்ள பாடசாலைகளின் அதிபர்கள் மற்றும் ஆசிரியர்களுக்கான "பாடசாலை மட்ட முகாமைத்துவ வலுவூட்டும்" விசேட செயலமர்வு கடந்த சனிக்கிழமை (07.03.2026) அன்று கோட்டைக்கல்லாறு கண்ணகி வித்தியாலயத்தில் நடைபெற்றது.
இந்தச் செயலமர்வில் கோட்டைக்கல்லாறு மகாவித்தியாலயம், கல்முந்தல் திருவள்ளுவர் வித்தியாலயம் மற்றும் கண்ணகி வித்தியாலயம் ஆகிய மூன்று பாடசாலைகளைப் பிரதிநிதித்துவப்படுத்தி அதிபர்கள், பகுதித் தலைவர்கள் மற்றும் ஆசிரியர்கள் ஆர்வத்துடன் கலந்துகொண்டனர்.
வளவாளர்களின் வழிகாட்டல்
நிகழ்வில் பிரதான வளவாளர்களாகப் பின்வருவோர் கலந்துகொண்டு சிறப்பித்தனர்.
திரு. சிவஞானம் சிறிதரன் (பட்டிருப்பு வலயக்கல்விப் பணிப்பாளர்)
திரு. ஆர். விவேகானந்தராசா (இலங்கை திறந்த பல்கலைக்கழகத்தின் சிரேஷ்ட விரிவுரையாளர்)
திரு. கவியரசன் (ஆசிரிய ஆலோசகர்)
முக்கிய கலந்துரையாடல்கள்
பாடசாலைகளின் நிருவாகக் கட்டமைப்பை எவ்வாறு சீரமைப்பது, பாடசாலை மட்ட முகாமைத்துவத்தை (SBM) வலுப்படுத்துவதன் மூலம் மாணவர்களின் அடைவு மட்டங்களை எவ்வாறு உயர்த்துவது மற்றும் திட்டமிடல்களை முறையாக முன்னெடுப்பது தொடர்பில் இங்கு விரிவான தெளிவூட்டல்கள் வழங்கப்பட்டன.
தற்கால கல்விச் சவால்களை எதிர்கொள்ளும் வகையில் ஆசிரியர்களின் ஆளுமை விருத்தி மற்றும் தலைமைத்துவப் பண்புகளை மேம்படுத்துவது குறித்து வளவாளர்கள் இதன்போது விரிவாக விளக்கமளித்தனர்.