கொழும்பிலிருந்து பதுளை நோக்கிப் பயணித்த இலங்கை போக்குவரத்து சபைக்குச் சொந்தமான பேருந்து ஒன்று, தியதலாவ பகுதியில் கட்டுப்பாட்டை இழந்து பள்ளத்தில் கவிழ்ந்து விபத்துக்குள்ளானதில் 40 பேர் காயமடைந்துள்ளனர்.
இன்று (27.06.2026) ஆம் திகதி அதிகாலை 12.45 மணியளவில் தியதலாவ புகையிரத நிலையத்திற்கு அருகிலுள்ள கல்கந்த பகுதியில் இவ்விபத்து சம்பவித்துள்ளது.
40-க்கும் மேற்பட்ட பயணிகளுடன் பயணித்த இப்பேருந்து, திடீரென ஓட்டுநரின் கட்டுப்பாட்டை இழந்து, வீதியை விட்டும் விலகி அருகிலிருந்த பள்ளத்தில் இருந்த புகையிரதப் பாதையின் மேல் பாய்ந்து கவிழ்ந்துள்ளது.
அதிதீவிர சிகிச்சைப் பிரிவில் மூவர்
விபத்தில் காயமடைந்த 40 பேரும் உடனடியாக தியதலாவ போதனா வைத்தியசாலையில் அனுமதிக்கப்பட்டனர்.
அவர்களில் பெரும்பாலானோருக்கு சிறு காயங்கள் மாத்திரமே ஏற்பட்டுள்ள நிலையில், பலத்த காயமடைந்து நிலைமை கவலைக்கிடமாக இருந்த மூவர் பதுளை மாகாண பொது வைத்தியசாலைக்கு மாற்றப்பட்டு, அங்குள்ள அதிதீவிர சிகிச்சைப் பிரிவில் (ICU) அனுமதிக்கப்பட்டுள்ளதாக மருத்துவமனை வட்டாரங்கள் தெரிவிக்கின்றன.
"பயணிகள் அனைவரும் தூங்கிக்கொண்டிருந்த நேரத்தில் திடீரென பலத்த சத்தம் கேட்டது. கண் இமைக்கும் நேரத்திற்குள் பேருந்து தலைகீழாகக் கவிழ்ந்துவிட்டது" என விபத்தில் சிறு காயங்களுடன் உயிர் தப்பிய பயணி ஒருவர் கண்ணீருடன் தெரிவித்தார்.
நள்ளிரவில் ஏற்பட்ட பலத்த சத்தத்தைக் கேட்டு சம்பவ இடத்திற்கு விரைந்த அப்பகுதி பொதுமக்களும் பொலிஸாரும் இணைந்து, பேருந்தின் இடிபாடுகளுக்குள் சிக்கியிருந்த பயணிகளை அதிரடியாக மீட்டெடுத்தனர்.
ஓட்டுநரின் தூக்கக் கலக்கம் மற்றும் அதிவேகமே இந்த விபத்துக்கு முதன்மைக் காரணம் என முதற்கட்ட பொலிஸ் விசாரணைகளில் தெரியவந்துள்ளது.
அத்துடன், விபத்து நடந்த இப்பகுதியில் இதற்கு முன்னரும் பல விபத்துக்கள் பதிவாகியுள்ளமை குறிப்பிடத்தக்கது.
இவ்விபத்து குறித்து தியதலாவ பொலிஸார் மேலதிக விசாரணைகளை மேற்கொண்டு வருகின்றனர்.