தமிழ்த் திரையுலகின் ஜாம்பவானும், ஈழத்தமிழர்களின் உரிமைக்காகத் தொடர்ச்சியாகக் குரல் கொடுத்து வந்தவருமான இயக்குநர் பாரதிராஜா (வயது 84) இன்று (10/06/2026) இயற்கை எய்தினார்.
அவரது மறைவு உலகத் தமிழர்கள் மத்தியிலும் திரையுலகினர் மத்தியிலும் பெரும் சோகத்தை ஏற்படுத்தியுள்ளது.
திரையுலகப் புரட்சியாளர்
1941 ஜூலை 17 அன்று தேனி மாவட்டம் அல்லிநகரத்தில் பெரியமாயத்தேவர் - கருத்தம்மாள் இணையருக்கு மகனாகப் பிறந்தார். 'சின்னச்சாமி' என்ற இயற்பெயர் கொண்ட இவர், திரையுலகில் பாரதிராஜாவாக தடம் பதித்தார். சந்திரலீலா என்ற மனைவியும், மனோஜ், ஜனனி என்ற இரு பிள்ளைகளும் இவருக்கு உள்ளனர்.
தமிழ்த்திரைப்படங்களை நான்கு சுவற்றுக்குள் இருந்து வெளிப்புறப் படப்பிடிப்புகளுக்கு (Out-door Shooting) கொண்டு சென்ற பெருமை இவரையே சாரும். கிராமத்து மண்வாசனை, உணர்வு நிறைந்த நாட்டுப்புறக் கதைகளைத் திரையில் செதுக்கியவர்.
இசையமைப்பாளர் இளையராஜாவுடன் இணைந்து இவர் வழங்கிய பாடல்கள் என்றும் அழியாதவை. ராதிகா, ராதா, ரேவதி, ரேகா, ரஞ்சிதா உள்ளிட்ட பல முன்னணி கதாநாயகிகளை திரையுலகிற்கு அறிமுகம் செய்த பெருமைக்குரியவர்.
சிறந்த இயக்குநராக மட்டுமன்றி, சில திரைப்படங்களில் குணச்சித்திர நடிகராகவும் தன் முத்திரையைப் பதித்துள்ளார்.
ஈழத்தமிழர் மீதான பற்றும் திரையுலகப் பங்களிப்பும்
வெறும் திரையோடு தன் எல்லையைச் சுருக்கிக் கொள்ளாத பாரதிராஜா, ஈழத்தமிழர்கள் மீதும் அவர்களின் கலை, இலக்கிய மேம்பாடு குறித்தும் எப்போதும் ஆழ்ந்த அக்கறை கொண்டவராகத் திகழ்ந்தார்.
ஈழத்தின் யாழ்ப்பாணம், மட்டக்களப்பு ஆகிய மாவட்டங்களுக்கு நேரில் வருகை தந்திருந்த அவர், "ஈழத்தில் உள்ள தமிழர்கள் நினைத்தால் எதனையும் இலகுவில் சாதித்துவிடும் வல்லமை கொண்டவர்கள்" என்று ஈழ மக்களின் ஆற்றலைப் பாராட்டி நம்பிக்கையூட்டினார்.
கடந்த 2009-ஆம் ஆண்டு ராமேஸ்வரத்தில் நடைபெற்ற ஈழத் தமிழர்களுக்கான ஆதரவுப் போராட்டத்தில் உணர்வுபூர்வமாகப் பங்கேற்று, அவர் ஆற்றிய எழுச்சி உரை உலகத் தமிழர்களால் இன்றும் மறக்க முடியாத ஒரு வரலாற்று நிகழ்வாகும்.
ஈழத்தின் போர்க்கால வாழ்வியலை அடியொற்றி எடுக்கப்பட்ட 'சினம்கொள்' போன்ற திரைப்படங்களுக்கு ஆதரவு வழங்கி, ஈழக் கலைஞர்களின் படைப்புகளை உலக அரங்கிற்கு கொண்டு சேர்க்கத் துணையாக நின்றார்.
உலகெங்கும் நடைபெறும் தமிழீழக் கலாச்சார விழாக்கள் மற்றும் பன்னாட்டுத் தமிழ் உணர்வு மாநாடுகளில் சிறப்பு விருந்தினராகக் கலந்துகொண்டு, ஈழ மக்களின் விடுதலை உணர்வை உலகறியச் செய்வதில் முக்கிய பங்காற்றினார்.
ஈழத்தமிழர்களின் துயரங்களை உணர்ந்து, அவர்களது கலை மற்றும் உரிமைப் போராட்டங்களுக்குத் தன் வாழ்நாள் முழுவதும் குரல் கொடுத்து வந்த மாபெரும் கலைஞர் பாரதிராஜாவின் மறைவுக்கு, உலகத் தமிழர்களும் ஈழப் பற்றாளர்களும் தங்களது ஆழ்ந்த இரங்கல்களையும் கண்ணீர் அஞ்சலியையும் செலுத்தி வருகின்றனர்.