மன்னார் மாவட்ட பொது வைத்தியசாலையின் வரலாற்றில் முதன்முறையாக, மூளைச்சாவடைந்த நோயாளி ஒருவரின் உறுப்புகள் தானமாகப் பெறப்பட்டு, இருவருக்கு வெற்றிகரமாகப் பொருத்தப்பட்டு புதிய வாழ்வு அளிக்கப்பட்டுள்ளது.
அதி தீவிர சிகிச்சைப் பிரிவில் (ICU) சிகிச்சை பெற்று வந்த நோயாளி ஒருவர் மூளைச்சாவடைந்த நிலையில், "எங்கள் அன்புக்குரியவர் நம்மை விட்டுப் பிரிந்தாலும், அவரது உறுப்புகள் மூலம் வேறொருவர் வாழ வேண்டும்" என்ற உயரிய நோக்குடன் அவரது குடும்பத்தினர் உறுப்பு தானத்திற்குச் சம்மதம் தெரிவித்தனர்.
குடும்பத்தினரின் இந்த நெகிழ்ச்சியூட்டும் மனிதநேய முடிவையடுத்து, தானமாகப் பெறப்பட்ட இரு சிறுநீரகங்களும் நீண்டகாலமாகச் சிறுநீரக நோயால் பாதிக்கப்பட்டிருந்த இரு நோயாளிகளுக்கு வெற்றிகரமாகப் பொருத்தப்பட்டுள்ளன.
இந்த வரலாற்றுச் சிறப்புமிக்கச் சாதனை குறித்து மன்னார் மாவட்ட பொது வைத்தியசாலையின் பணிப்பாளர் வைத்தியர் ஆஷாத் எம். கனீபா தெரிவிக்கையில், "மன்னார் வைத்தியசாலை வரலாற்றில் மேற்கொள்ளப்பட்ட இத்தகைய முதன்மை நடவடிக்கை, உறுப்பு தானத்தின் முக்கியத்துவத்தையும் மனிதநேயத்தின் மேன்மையையும் உணர்த்துவதோடு, பலருக்கும் புதிய நம்பிக்கையை வழங்கும் ஒரு முன்மாதிரிச் செயலாக அமைந்துள்ளது" எனக் குறிப்பிட்டுள்ளார்.
ஒரு உயிர் பிரிந்தாலும், தன் கொடையினால் இரு உயிர்களை வாழ வைத்த இந்த நெகிழ்ச்சியான நிகழ்வு அப்பகுதி மக்களிடையே பெரும் நெகிழ்ச்சியையும் பாராட்டையும் பெற்றுள்ளது.