மட்டக்களப்பு - கல்லடி பழைய பாலத்தில் நேற்று இரவு (13.10.2026) வாவியில் குதித்து தற்கொலை செய்ய முயன்ற 19 வயது யுவதி ஒருவர், மீனவர்களின் துரித நடவடிக்கையால் மீட்கப்பட்டு மட்டக்களப்பு போதனா வைத்தியசாலையில் அனுமதிக்கப்பட்டுள்ளார்.
இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.
செவ்வாய்க்கிழமை (13.10.2026)ஆம் திகதி இரவு 8.00 மணியளவில் கல்லடி பழைய பாலத்திற்கு வந்த குறித்த யுவதி, தனது செருப்பு, கைப்பை மற்றும் குடை ஆகியவற்றை பாலத்தின் மேல் கழற்றி வைத்துவிட்டு, திடீரென வாவியில் குதித்து தற்கொலைக்கு முயன்றுள்ளார்.
அதேவேளையில் அருகில் வாவியில் மீன்பிடித்துக் கொண்டிருந்த மீனவர்கள், நிலைமையின் தீவிரத்தை உணர்ந்து உடனடியாகச் செயற்பட்டனர்.
அவர்கள் நீரில் தத்தளித்த யுவதியை மீட்டு பத்திரமாக கரை சேர்த்தனர்.
தகவலறிந்து உடனடியாகச் சம்பவ இடத்திற்கு விரைந்த மட்டக்களப்பு தலைமையகப் பொலிசார், 1990 அவசர அம்புலன்ஸ் சேவை மூலம் யுவதியை மட்டக்களப்பு போதனா வைத்தியசாலையின் அவசர சிகிச்சைப் பிரிவில் அனுமதித்தனர்.
தற்கொலைக்கு முயன்ற யுவதி பிறிதொரு பிரதேசத்தில் இருந்து வந்துள்ளதாகவும், அவர் இந்த விபரீத முடிவை எடுப்பதற்கான காரணங்கள் என்னவென்பது குறித்தும் மட்டக்களப்பு தலைமையகப் பொலிசார் தீவிர விசாரணைகளை மேற்கொண்டு வருகின்றனர்.
தொடரும் தற்கொலை முயற்சிகள் மற்றும் புள்ளிவிபரங்கள்...
இதே கல்லடி பாலத்தில் இருந்து கடந்த மாதம் இளைஞர் ஒருவர் வாவியில் குதித்து தற்கொலை செய்து கொண்டமை குறிப்பிடத்தக்கது.
இதனிடையே, மட்டக்களப்பு மாவட்டப் பொலிஸ் பிரிவு புள்ளிவிபரங்களின்படி, இந்த வருடம் ஜனவரி 1 ஆம் திகதி முதல் ஒக்டோபர் 12 ஆம் திகதி வரை மாவட்டத்தில் 90 பேர் தற்கொலை செய்து கொண்டுள்ளதாகத் தெரியவந்துள்ளமை குறிப்பிடத்தக்கது.